Sobre a vacina?

Por que vacinarse fronte á gripe?
Por que hai que vacinarse cada ano?
A vacina pode provocarme a gripe?
É segura a vacina da gripe?
Onde vacinarse fronte á gripe?
Cando vacinarse?

Por que vacinarse fronte á gripe?
A vacinación é o método máis eficaz para poder diminuír o número de casos de gripe, así como as complicacións graves e as mortes derivadas do seu padecemento, especialmente nos grupos de risco.
En persoas de idade avanzada a vacina reduce a enfermidade e complicacións ata un 60% e as mortes nun 80%.


Por que hai que vacinarse cada ano?
A vacina da gripe é a única vacina que se reformula cada ano, en resposta á variación constante dos virus gripais, co obxectivo de que os virus incluídos na vacina concorden cos circulantes. Por esta razón é necesaria a vacinación anual.


A vacina pode provocarme a gripe?
¡NUNCA!
As vacinas antigripais utilizadas conteñen soamente virus inactivados (NON INFECCIOSOS), polo que é imposible que cause a gripe.


É segura a vacina da gripe?
É unha das vacinas máis seguras e que reúne a menor taxa de notificacións de efectos adversos.
Os efectos adversos son pouco frecuentes e, cando aparecen, adoitan ser leves, locais e de curta duración, o máis frecuente é a reacción local no lugar da inxección e habitualmente desaparecen sen necesidade de tratamento. Ás veces, pode aparecer febre, malestar e dores musculares (1-2 días).
Estase empregando desde hai máis de 60 anos e xa se administraron máis de 1.000 millóns de doses.


Onde vacinarse fronte á gripe?
Nos centros sanitarios, solicitando cita do xeito habitual (teléfono, internet ...) ou no seu centro médico de referencia (se non pertence á rede do Servizo Galego de Saúde).


Cando vacinarse?
A campaña de vacinación comeza o día 23 de outubro e finaliza o 29 de decembro, polo que dispón de tempo suficiente para vacinarse, sen necesidade de acudir os primeiros días de campaña, evitando así aglomeracións.

A nosa prioridade, a túa garantía
Xunta de Galicia © Xunta de Galicia. Información mantida e publicada en internet pola Consellería de Sanidade - Servizo Galego de Saúde
Galicia o bo cambio